Aniccatākathā

Neither a German nor an English translation of this text is held here — the Pāli text is shown.

Ekādasamavagga

Aniccatā parinipphannāti? Āmantā. Tāya aniccatāya aniccatā parinipphannāti? Na hevaṁ vattabbe …pe… tāya aniccatāya aniccatā parinipphannāti? Āmantā. Tāya tāyeva natthi dukkhassantakiriyā, natthi vaṭṭupacchedo, natthi anupādāparinibbānanti? Na hevaṁ vattabbe.

Jarā parinipphannāti? Āmantā. Tāya jarāya jarā parinipphannāti? Na hevaṁ vattabbe …pe… tāya jarāya jarā parinipphannāti? Āmantā. Tāya tāyeva natthi dukkhassantakiriyā, natthi vaṭṭupacchedo, natthi anupādāparinibbānanti? Na hevaṁ vattabbe …pe….

Maraṇaṁ parinipphannanti? Āmantā. Tassa maraṇassa maraṇaṁ parinipphannanti? Na hevaṁ vattabbe. Tassa maraṇassa maraṇaṁ parinipphannanti? Āmantā. Tassa tasseva natthi dukkhassantakiriyā, natthi vaṭṭupacchedo, natthi anupādāparinibbānanti? Na hevaṁ vattabbe …pe….

Rūpaṁ parinipphannaṁ, rūpassa aniccatā atthīti? Āmantā. Aniccatā parinipphannā, aniccatāya aniccatā atthīti? Na hevaṁ vattabbe …pe… rūpaṁ parinipphannaṁ, rūpassa jarā atthīti? Āmantā. Jarā parinipphannā, jarāya jarā atthīti? Na hevaṁ vattabbe …pe….

Rūpaṁ parinipphannaṁ, rūpassa bhedo atthi, antaradhānaṁ atthīti? Āmantā. Maraṇaṁ parinipphannaṁ, maraṇassa bhedo atthi, antaradhānaṁ atthīti? Na hevaṁ vattabbe …pe….

Vedanā …pe… saññā … saṅkhārā …pe… viññāṇaṁ parinipphannaṁ, viññāṇassa aniccatā atthīti? Āmantā. Aniccatā parinipphannā, aniccatāya aniccatā atthīti? Na hevaṁ vattabbe …pe… viññāṇaṁ parinipphannaṁ, viññāṇassa jarā atthīti? Āmantā. Jarā parinipphannā, jarāya jarā atthīti? Na hevaṁ vattabbe …pe….

Viññāṇaṁ parinipphannaṁ, viññāṇassa bhedo atthi, antaradhānaṁ atthīti? Āmantā. Maraṇaṁ parinipphannaṁ, maraṇassa bhedo atthi, antaradhānaṁ atthīti? Na hevaṁ vattabbe …pe….

Aniccatākathā niṭṭhitā. Ekādasamo vaggo.

Tassuddānaṁ

Anusayā abyākatā, ahetukā, cittavippayuttā, aññāṇe vigate ñāṇī, ñāṇaṁ cittavippayuttaṁ, yattha sadde ñāṇaṁ pavattati, iddhibalena samannāgato kappaṁ tiṭṭheyya, cittasantati samādhi, dhammaṭṭhitatā, aniccatāti.