Kv 19.3
Sāmaññaphalakathā
Neither a German nor an English translation of this text is held here — the Pāli text is shown.
Ekūnavīsatimavagga
Sāmaññaphalakathā
Sāmaññaphalaṁ asaṅkhatanti? Āmantā. Nibbānaṁ tāṇaṁ leṇaṁ saraṇaṁ parāyaṇaṁ accutaṁ amatanti? Na hevaṁ vattabbe …pe… sāmaññaphalaṁ asaṅkhataṁ, nibbānaṁ asaṅkhatanti? Āmantā. Dve asaṅkhatānīti? Na hevaṁ vattabbe …pe… dve asaṅkhatānīti? Āmantā. Dve tāṇāni …pe… antarikā vāti? Na hevaṁ vattabbe …pe….
Sāmaññaphalaṁ asaṅkhatanti? Āmantā. Sāmaññaṁ asaṅkhatanti? Na hevaṁ vattabbe …pe… sāmaññaṁ saṅkhatanti? Āmantā. Sāmaññaphalaṁ saṅkhatanti? Na hevaṁ vattabbe …pe….
Sotāpattiphalaṁ asaṅkhatanti? Āmantā. Sotāpattimaggo asaṅkhatoti? Na hevaṁ vattabbe …pe… sotāpattimaggo saṅkhatoti? Āmantā. Sotāpattiphalaṁ saṅkhatanti? Na hevaṁ vattabbe …pe….
Sakadāgāmiphalaṁ …pe… anāgāmiphalaṁ …pe… arahattaphalaṁ asaṅkhatanti? Āmantā. Arahattamaggo asaṅkhatoti? Na hevaṁ vattabbe …pe… arahattamaggo saṅkhatoti? Āmantā. Arahattaphalaṁ saṅkhatanti? Na hevaṁ vattabbe …pe….
Sotāpattiphalaṁ asaṅkhataṁ, sakadāgāmiphalaṁ …pe… anāgāmiphalaṁ …pe… arahattaphalaṁ asaṅkhataṁ, nibbānaṁ asaṅkhatanti? Āmantā. Pañca asaṅkhatānīti? Na hevaṁ vattabbe …pe… pañca asaṅkhatānīti? Āmantā. Pañca tāṇāni …pe… antarikā vāti? Na hevaṁ vattabbe …pe….
Sāmaññaphalakathā niṭṭhitā.