Ya 3.3.5
3.3.5. Paccuppannānāgatavāra
Neither a German nor an English translation of this text is held here — the Pāli text is shown.
3.3.5. Paccuppannānāgatavāra
Yo cakkhāyatanaṁ parijānāti so sotāyatanaṁ parijānissatīti? No.
Yo vā pana sotāyatanaṁ parijānissati so cakkhāyatanaṁ parijānātīti? No.
Yo cakkhāyatanaṁ na parijānāti so sotāyatanaṁ na parijānissatīti?
Ye maggaṁ paṭilabhissanti te cakkhāyatanaṁ na parijānanti, no ca sotāyatanaṁ na parijānissanti. Arahā ye ca puthujjanā maggaṁ na paṭilabhissanti te cakkhāyatanañca na parijānanti sotāyatanañca na parijānissanti.
Yo vā pana sotāyatanaṁ na parijānissati so cakkhāyatanaṁ na parijānātīti?
Aggamaggasamaṅgī sotāyatanaṁ na parijānissati, no ca cakkhāyatanaṁ na parijānāti. Arahā ye ca puthujjanā maggaṁ na paṭilabhissanti te sotāyatanañca na parijānissanti cakkhāyatanañca na parijānanti.