Mil 7.5.4
4. Vicchikaṅgapañha
Neither a German nor an English translation of this text is held here — the Pāli text is shown.
Upacikāvagga
4. Vicchikaṅgapañha
“Bhante nāgasena, ‘vicchikassa ekaṁ aṅgaṁ gahetabban’ti yaṁ vadesi, katamaṁ taṁ ekaṁ aṅgaṁ gahetabban”ti? “Yathā, mahārāja, vicchiko naṅgulāvudho naṅgulaṁ ussāpetvā carati; evameva kho, mahārāja, yoginā yogāvacarena ñāṇāvudhena bhavitabbaṁ, ñāṇaṁ ussāpetvā viharitabbaṁ. Idaṁ, mahārāja, vicchikassa ekaṁ aṅgaṁ gahetabbaṁ. Bhāsitampetaṁ, mahārāja, therena upasenena vaṅgantaputtena—
‘Ñāṇakhaggaṁ gahetvāna,
viharanto vipassako;
Parimuccati sabbabhayā,
duppasaho ca so bhave’”ti.
Vicchikaṅgapañho catuttho.