2 Tiṇasanthārakattheraapadāna

Neither a German nor an English translation of this text is held here — the Pāli text is shown.

“Yaṁ dāyavāsiko isi,
tiṇaṁ lāyati satthuno;
Sabbe padakkhiṇāvaṭṭā,
pathabyā nipatiṁsu te.

Tamahaṁ tiṇamādāya,
santhariṁ dharaṇuttame;
Tīṇeva tālapattāni,
āharitvānahaṁ tadā.

Tiṇena chadanaṁ katvā,
siddhatthassa adāsahaṁ;
Sattāhaṁ dhārayuṁ tassa,
devamānusasatthuno.

Catunnavutito kappe,
yaṁ tiṇaṁ adadiṁ tadā;
Duggatiṁ nābhijānāmi,
tiṇadānassidaṁ phalaṁ.

Pañcasaṭṭhimhito kappe,
cattārosuṁ mahaddhanā;
Sattaratanasampannā,
cakkavattī mahabbalā.

Paṭisambhidā catasso,
…pe…
kataṁ buddhassa sāsanaṁ”.

Itthaṁ sudaṁ āyasmā tiṇasanthārako thero imā gāthāyo abhāsitthāti.

Tiṇasanthārakattherassāpadānaṁ dutiyaṁ.