Anulepadāyakattheraapadāna

Neither a German nor an English translation of this text is held here — the Pāli text is shown.

“Atthadassissa munino,
addasaṁ sāvakaṁ ahaṁ;
Navakammaṁ karontassa,
sīmāya upagacchahaṁ.

Niṭṭhite navakamme ca,
anulepamadāsahaṁ;
Pasannacitto sumano,
puññakkhette anuttare.

Aṭṭhārase kappasate,
yaṁ kammamakariṁ tadā;
Duggatiṁ nābhijānāmi,
anulepassidaṁ phalaṁ.

Paṭisambhidā catasso,
…pe…
kataṁ buddhassa sāsanaṁ”.

Itthaṁ sudaṁ āyasmā anulepadāyako thero imā gāthāyo abhāsitthāti.

Anulepadāyakattherassāpadānaṁ aṭṭhamaṁ.