Gandhadhūpiyattheraapadāna

Neither a German nor an English translation of this text is held here — the Pāli text is shown.

“Siddhatthassa bhagavato,
gandhadhūpaṁ adāsahaṁ;
Sumanehi paṭicchannaṁ,
buddhānucchavikañca taṁ.

Kañcanagghiyasaṅkāsaṁ,
buddhaṁ lokagganāyakaṁ;
Indīvaraṁva jalitaṁ,
ādittaṁva hutāsanaṁ.

Byagghusabhaṁva pavaraṁ,
abhijātaṁva kesariṁ;
Nisinnaṁ samaṇānaggaṁ,
bhikkhusaṅghapurakkhataṁ.

Disvā cittaṁ pasādetvā,
paggahetvāna añjaliṁ;
Vanditvā satthuno pāde,
pakkāmiṁ uttarāmukho.

Catunnavutito kappe,
yaṁ gandhamadadiṁ tadā;
Duggatiṁ nābhijānāmi,
gandhapūjāyidaṁ phalaṁ.

Paṭisambhidā catasso,
vimokkhāpi ca aṭṭhime;
Chaḷabhiññā sacchikatā,
kataṁ buddhassa sāsanaṁ”.

Itthaṁ sudaṁ āyasmā gandhadhūpiyo thero imā gāthāyo abhāsitthāti.

Gandhadhūpiyattherassāpadānaṁ paṭhamaṁ.