3 Tīṇuppalamāliyattheraapadāna

Neither a German nor an English translation of this text is held here — the Pāli text is shown.

“Candabhāgānadītīre,
ahosiṁ vānaro tadā;
Addasaṁ virajaṁ buddhaṁ,
nisinnaṁ pabbatantare.

Obhāsentaṁ disā sabbā,
sālarājaṁva phullitaṁ;
Lakkhaṇabyañjanūpetaṁ,
disvānattamano ahaṁ.

Udaggacitto sumano,
pītiyā haṭṭhamānaso;
Tīṇi uppalapupphāni,
matthake abhiropayiṁ.

Pūjayitvāna pupphāni,
phussassāhaṁ mahesino;
Sagāravo bhavitvāna,
pakkāmiṁ uttarāmukho.

Gacchanto paṭikuṭiko,
vippasannena cetasā;
Selantare patitvāna,
pāpuṇiṁ jīvitakkhayaṁ.

Tena kammena sukatena,
cetanāpaṇidhīhi ca;
Jahitvā purimaṁ jātiṁ,
tāvatiṁsamagacchahaṁ.

Satānaṁ tīṇikkhattuñca,
devarajjamakārayiṁ;
Satānaṁ pañcakkhattuñca,
cakkavattī ahosahaṁ.

Dvenavute ito kappe,
yaṁ pupphamabhipūjayiṁ;
Duggatiṁ nābhijānāmi,
buddhapūjāyidaṁ phalaṁ.

Paṭisambhidā catasso,
…pe…
kataṁ buddhassa sāsanaṁ”.

Itthaṁ sudaṁ āyasmā tīṇuppalamāliyo thero imā gāthāyo abhāsitthāti.

Tīṇuppalamāliyattherassāpadānaṁ tatiyaṁ.