Tipupphiyattheraapadāna

Neither a German nor an English translation of this text is held here — the Pāli text is shown.

“Migaluddo pure āsiṁ,
araññe kānane ahaṁ;
Pāṭaliṁ haritaṁ disvā,
tīṇi pupphāni okiriṁ.

Patitapattāni gaṇhitvā,
bahi chaḍḍesahaṁ tadā;
Antosuddhaṁ bahisuddhaṁ,
suvimuttaṁ anāsavaṁ.

Sammukhā viya sambuddhaṁ,
vipassiṁ lokanāyakaṁ;
Pāṭaliṁ abhivādetvā,
tattha kālaṅkato ahaṁ.

Ekanavutito kappe,
yaṁ bodhimabhipūjayiṁ;
Duggatiṁ nābhijānāmi,
bodhipūjāyidaṁ phalaṁ.

Samantapāsādikā nāma,
terasāsiṁsu rājino;
Ito tettiṁsakappamhi,
cakkavattī mahabbalā.

Paṭisambhidā catasso,
…pe…
kataṁ buddhassa sāsanaṁ”.

Itthaṁ sudaṁ āyasmā tipupphiyo thero imā gāthāyo abhāsitthāti.

Tipupphiyattherassāpadānaṁ chaṭṭhaṁ.