Vv 1
1. Paṭhamapīṭhavimānavatthu
Neither a German nor an English translation of this text is held here — the Pāli text is shown.
Pīṭhavagga
1. Paṭhamapīṭhavimānavatthu
Namo tassa Bhagavato Arahato Sammāsambuddhassa.
“Pīṭhaṁ te sovaṇṇamayaṁ uḷāraṁ,
Manojavaṁ gacchati yenakāmaṁ;
Alaṅkate malyadhare suvatthe,
Obhāsasi vijjurivabbhakūṭaṁ.
Kena tetādiso vaṇṇo,
kena te idha mijjhati;
Uppajjanti ca te bhogā,
ye keci manaso piyā.
Pucchāmi taṁ devi mahānubhāve,
Manussabhūtā kimakāsi puññaṁ;
Kenāsi evaṁ jalitānubhāvā,
Vaṇṇo ca te sabbadisā pabhāsatī”ti.
Sā devatā attamanā,
moggallānena pucchitā;
Pañhaṁ puṭṭhā viyākāsi,
yassa kammassidaṁ phalaṁ.
“Ahaṁ manussesu manussabhūtā,
Abbhāgatānāsanakaṁ adāsiṁ;
Abhivādayiṁ añjalikaṁ akāsiṁ,
Yathānubhāvañca adāsi dānaṁ.
Tena metādiso vaṇṇo,
tena me idha mijjhati;
Uppajjanti ca me bhogā,
ye keci manaso piyā.
Akkhāmi te bhikkhu mahānubhāva,
Manussabhūtā yamakāsi puññaṁ;
Tenamhi evaṁ jalitānubhāvā,
Vaṇṇo ca me sabbadisā pabhāsatī”ti.
Paṭhamapīṭhavimānaṁ paṭhamaṁ.