Kv 12.8
Erörterung über die Beraubung des Lebens
Arbeitsübersetzung Dieser Titel ist maschinell übersetzt und noch nicht von Menschen geprüft. Der Text selbst ist nicht übersetzt.
Jīvitāvoropanakathā
Von diesem Text gibt es hier weder eine deutsche noch eine englische Übersetzung — angezeigt wird der Pāli-Wortlaut.
Dvādasamavagga
Jīvitāvoropanakathā
Diṭṭhisampanno puggalo sañcicca pāṇaṁ jīvitā voropeyyāti? Āmantā. Diṭṭhisampanno puggalo sañcicca mātaraṁ jīvitā voropeyya …pe… pitaraṁ jīvitā voropeyya …pe… arahantaṁ jīvitā voropeyya …pe… duṭṭhena cittena tathāgatassa lohitaṁ uppādeyya …pe… saṅghaṁ bhindeyyāti? Na hevaṁ vattabbe …pe….
Diṭṭhisampanno puggalo sañcicca pāṇaṁ jīvitā voropeyyāti? Āmantā. Diṭṭhisampanno puggalo satthari agāravoti? Na hevaṁ vattabbe …pe… dhamme …pe… saṅghe …pe… sikkhāya agāravoti? Na hevaṁ vattabbe …pe….
Nanu diṭṭhisampanno puggalo satthari sagāravoti? Āmantā. Hañci diṭṭhisampanno puggalo satthari sagāravo, no ca vata re vattabbe— “diṭṭhisampanno puggalo sañcicca pāṇaṁ jīvitā voropeyyā”ti. Nanu diṭṭhisampanno puggalo dhamme …pe… saṅghe …pe… sikkhāya sagāravoti? Āmantā. Hañci diṭṭhisampanno puggalo sikkhāya sagāravo, no ca vata re vattabbe— “diṭṭhisampanno puggalo sañcicca pāṇaṁ jīvitā voropeyyā”ti.
Diṭṭhisampanno puggalo satthari agāravoti? Āmantā. Diṭṭhisampanno puggalo buddhathūpe ohadeyya omutteyya niṭṭhubheyya buddhathūpe apabyāmato kareyyāti? Na hevaṁ vattabbe …pe….
Diṭṭhisampanno puggalo sañcicca pāṇaṁ jīvitā voropeyyāti? Āmantā. Nanu vuttaṁ bhagavatā— “seyyathāpi, bhikkhave, mahāsamuddo ṭhitadhammo velaṁ nātivattati; evameva kho, bhikkhave, yaṁ mayā sāvakānaṁ sikkhāpadaṁ paññattaṁ taṁ mama sāvakā jīvitahetupi nātikkamantī”ti. Attheva suttantoti? Āmantā. Tena hi na vattabbaṁ— “diṭṭhisampanno puggalo sañcicca pāṇaṁ jīvitā voropeyyā”ti.
Jīvitā voropanakathā niṭṭhitā.