Pv 23
Die Gespenstergeschichte vom Faden
Arbeitsübersetzung Dieser Titel ist maschinell übersetzt und noch nicht von Menschen geprüft. Der Text selbst ist nicht übersetzt.
11. Suttapetavatthu
Von diesem Text gibt es hier weder eine deutsche noch eine englische Übersetzung — angezeigt wird der Pāli-Wortlaut.
11. Suttapetavatthu
“Ahaṁ pure pabbajitassa bhikkhuno,
Suttaṁ adāsiṁ upasaṅkamma yācitā;
Tassa vipāko vipulaphalūpalabbhati,
Bahukā ca me uppajjare vatthakoṭiyo.
Pupphābhikiṇṇaṁ ramitaṁ vimānaṁ,
Anekacittaṁ naranārisevitaṁ;
Sāhaṁ bhuñjāmi ca pārupāmi ca,
Pahūtavittā na ca tāva khīyati.
Tasseva kammassa vipākamanvayā,
Sukhañca sātañca idhūpalabbhati;
Sāhaṁ gantvā punadeva mānusaṁ,
Kāhāmi puññāni nayayyaputta man”ti.
“Satta tuvaṁ vassasatā idhāgatā,
Jiṇṇā ca vuḍḍhā ca tahiṁ bhavissasi;
Sabbeva te kālakatā ca ñātakā,
Kiṁ tattha gantvāna ito karissasī”ti.
“Satteva vassāni idhāgatāya me,
Dibbañca sukhañca samappitāya;
Sāhaṁ gantvāna punadeva mānusaṁ,
Kāhāmi puññāni nayayyaputta man”ti.
So taṁ gahetvāna pasayha bāhāyaṁ,
Paccānayitvāna theriṁ sudubbalaṁ;
“Vajjesi aññampi janaṁ idhāgataṁ,
‘Karotha puññāni sukhūpalabbhati’.
Diṭṭhā mayā akatena sādhunā,
Petā vihaññanti tatheva manussā;
Kammañca katvā sukhavedanīyaṁ,
Devā manussā ca sukhe ṭhitā pajā”ti.
Suttapetavatthu ekādasamaṁ.