Pv 31
Die Gespenstergeschichte von Seriṇī
Arbeitsübersetzung Dieser Titel ist maschinell übersetzt und noch nicht von Menschen geprüft. Der Text selbst ist nicht übersetzt.
6. Seriṇīpetivatthu
Von diesem Text gibt es hier weder eine deutsche noch eine englische Übersetzung — angezeigt wird der Pāli-Wortlaut.
6. Seriṇīpetivatthu
“Naggā dubbaṇṇarūpāsi,
kisā dhamanisanthatā;
Upphāsulike kisike,
kā nu tvaṁ idha tiṭṭhasī”ti.
“Ahaṁ bhadante petīmhi,
duggatā yamalokikā;
Pāpakammaṁ karitvāna,
petalokaṁ ito gatā”ti.
“Kiṁ nu kāyena vācāya,
manasā dukkaṭaṁ kataṁ;
Kissa kammavipākena,
petalokaṁ ito gatā”ti.
“Anāvaṭesu titthesu,
viciniṁ aḍḍhamāsakaṁ;
Santesu deyyadhammesu,
dīpaṁ nākāsimattano.
Nadiṁ upemi tasitā,
rittakā parivattati;
Chāyaṁ upemi uṇhesu,
ātapo parivattati.
Aggivaṇṇo ca me vāto,
ḍahanto upavāyati;
Etañca bhante arahāmi,
aññañca pāpakaṁ tato.
Gantvāna hatthiniṁ puraṁ,
vajjesi mayha mātaraṁ;
‘Dhītā ca te mayā diṭṭhā,
duggatā yamalokikā;
Pāpakammaṁ karitvāna,
petalokaṁ ito gatā’.
Atthi me ettha nikkhittaṁ,
anakkhātañca taṁ mayā;
Cattārisatasahassāni,
pallaṅkassa ca heṭṭhato.
Tato me dānaṁ dadatu,
tassā ca hotu jīvikā;
Dānaṁ datvā ca me mātā,
dakkhiṇaṁ anudicchatu;
Tadāhaṁ sukhitā hessaṁ,
sabbakāmasamiddhinī”ti.
“Sādhū”ti so paṭissutvā,
gantvāna hatthiniṁ puraṁ;
Avoca tassā mātaraṁ—
“Dhītā ca te mayā diṭṭhā,
duggatā yamalokikā;
Pāpakammaṁ karitvāna,
petalokaṁ ito gatā.
Sā maṁ tattha samādapesi, (…)
Vajjesi mayha mātaraṁ;
‘Dhītā ca te mayā diṭṭhā,
Duggatā yamalokikā;
Pāpakammaṁ karitvāna,
Petalokaṁ ito gatā.
Atthi ca me ettha nikkhittaṁ,
anakkhātañca taṁ mayā;
Cattārisatasahassāni,
pallaṅkassa ca heṭṭhato.
Tato me dānaṁ dadatu,
tassā ca hotu jīvikā;
Dānaṁ datvā ca me mātā,
dakkhiṇaṁ anudicchatu (…);
Tadāhaṁ sukhitā hessaṁ,
sabbakāmasamiddhinī’”ti.
Tato hi sā dānamadā,
tassā dakkhiṇamādisī;
Petī ca sukhitā āsi,
tassā cāsi sujīvikāti.
Seriṇīpetivatthu chaṭṭhaṁ.