Tha Ap 19
7 Lebensgeschichte des Upasena Vaṅgantaputta
Arbeitsübersetzung Dieser Titel ist maschinell übersetzt und noch nicht von Menschen geprüft. Der Text selbst ist nicht übersetzt.
7 Upasenavaṅgantaputtattheraapadāna
Von diesem Text gibt es hier weder eine deutsche noch eine englische Übersetzung — angezeigt wird der Pāli-Wortlaut.
7 Upasenavaṅgantaputtattheraapadāna
“Padumuttaraṁ bhagavantaṁ,
lokajeṭṭhaṁ narāsabhaṁ;
Pabbhāramhi nisīdantaṁ,
upagacchiṁ naruttamaṁ.
Kaṇikārapupphaṁ disvā,
vaṇṭe chetvānahaṁ tadā;
Alaṅkaritvā chattamhi,
buddhassa abhiropayiṁ.
Piṇḍapātañca pādāsiṁ,
paramannaṁ subhojanaṁ;
Buddhena navame tattha,
samaṇe aṭṭha bhojayiṁ.
Anumodi mahāvīro,
sayambhū aggapuggalo;
Iminā chattadānena,
paramannapavecchanā.
Tena cittappasādena,
sampattimanubhossasi;
Chattiṁsakkhattuṁ devindo,
devarajjaṁ karissati.
Ekavīsatikkhattuñca,
cakkavattī bhavissati;
Padesarajjaṁ vipulaṁ,
gaṇanāto asaṅkhiyaṁ.
Satasahassito kappe,
okkākakulasambhavo;
Gotamo nāma gottena,
satthā loke bhavissati.
Sāsane dibbamānamhi,
manussattaṁ gamissati;
Tassa dhammesu dāyādo,
oraso dhammanimmito.
Upasenoti nāmena,
hessati satthu sāvako;
Samantapāsādikattā,
aggaṭṭhāne ṭhapessati.
Carimaṁ vattate mayhaṁ,
bhavā sabbe samūhatā;
Dhāremi antimaṁ dehaṁ,
jetvā māraṁ savāhiniṁ.
Paṭisambhidā catasso,
vimokkhāpi ca aṭṭhime;
Chaḷabhiññā sacchikatā,
kataṁ buddhassa sāsanaṁ”.
Itthaṁ sudaṁ āyasmā upaseno vaṅgantaputto thero imā gāthāyo abhāsitthāti.
Upasenavaṅgantaputtattherassāpadānaṁ sattamaṁ. Tatiyabhāṇavāraṁ.