Tha Ap 302
Lebensgeschichte des Mönchs Verkünder
Arbeitsübersetzung Dieser Titel ist maschinell übersetzt und noch nicht von Menschen geprüft. Der Text selbst ist nicht übersetzt.
Anusaṁsāvakattheraapadāna
Von diesem Text gibt es hier weder eine deutsche noch eine englische Übersetzung — angezeigt wird der Pāli-Wortlaut.
Anusaṁsāvakattheraapadāna
“Piṇḍāya caramānāhaṁ,
vipassimaddasaṁ jinaṁ;
Uḷuṅgabhikkhaṁ pādāsiṁ,
dvipadindassa tādino.
Pasannacitto sumano,
abhivādesahaṁ tadā;
Anusaṁsāvayiṁ buddhaṁ,
uttamatthassa pattiyā.
Ekanavutito kappe,
anusaṁsāvayiṁ ahaṁ;
Duggatiṁ nābhijānāmi,
anusaṁsāvanā phalaṁ.
Paṭisambhidā catasso,
…pe…
kataṁ buddhassa sāsanaṁ”.
Itthaṁ sudaṁ āyasmā anusaṁsāvako thero imā gāthāyo abhāsitthāti.
Anusaṁsāvakattherassāpadānaṁ dasamaṁ.
Citakapūjakavaggo tiṁsatimo.
Tassuddānaṁ
Citakaṁ pārichatto ca,
saddagosīsasantharaṁ;
Pādo padesaṁ saraṇaṁ,
ambo saṁsāvakopi ca;
Aṭṭhatālīsa gāthāyo,
gaṇitāyo vibhāvibhi.
Atha vagguddānaṁ
Kaṇikāro hatthidado,
ālambaṇudakāsanaṁ;
Tuvaraṁ thomako ceva,
ukkhepaṁ sīsupadhānaṁ.
Paṇṇado citapūjī ca,
gāthāyo ceva sabbaso;
Cattāri ca satānīha,
ekapaññāsameva ca.
Pañcavīsasatā sabbā,
dvāsattati taduttari;
Tisataṁ apadānānaṁ,
gaṇitā atthadassibhi.
Kaṇikāravaggadasakaṁ.
Tatiyasatakaṁ samattaṁ.