Tha Ap 443
Lebensgeschichte des Mönchs mit dem Kern der Vibhītaka-Frucht
Arbeitsübersetzung Dieser Titel ist maschinell übersetzt und noch nicht von Menschen geprüft. Der Text selbst ist nicht übersetzt.
1 Vibhītakamiñjiyattheraapadāna
Von diesem Text gibt es hier weder eine deutsche noch eine englische Übersetzung — angezeigt wird der Pāli-Wortlaut.
1 Vibhītakamiñjiyattheraapadāna
“Kakusandho mahāvīro,
sabbadhammāna pāragū;
Gaṇamhā vūpakaṭṭho so,
agamāsi vanantaraṁ.
Bījamiñjaṁ gahetvāna,
latāya āvuṇiṁ ahaṁ;
Bhagavā tamhi samaye,
jhāyate pabbatantare.
Disvānahaṁ devadevaṁ,
vippasannena cetasā;
Dakkhiṇeyyassa vīrassa,
bījamiñjamadāsahaṁ.
Imasmiṁyeva kappamhi,
yaṁ miñjamadadiṁ tadā;
Duggatiṁ nābhijānāmi,
bījamiñjassidaṁ phalaṁ.
Kilesā jhāpitā mayhaṁ,
bhavā sabbe samūhatā;
Nāgova bandhanaṁ chetvā,
viharāmi anāsavo.
Svāgataṁ vata me āsi,
mama buddhassa santike;
Tisso vijjā anuppattā,
kataṁ buddhassa sāsanaṁ.
Paṭisambhidā catasso,
vimokkhāpi ca aṭṭhime;
Chaḷabhiññā sacchikatā,
kataṁ buddhassa sāsanaṁ”.
Itthaṁ sudaṁ āyasmā vibhītakamiñjiyo thero imā gāthāyo abhāsitthāti.
Vibhītakamiñjiyattherassāpadānaṁ paṭhamaṁ.