Tha Ap 50
8 Lebensgeschichte des Mönchs Wandelgang-Spender
Arbeitsübersetzung Dieser Titel ist maschinell übersetzt und noch nicht von Menschen geprüft. Der Text selbst ist nicht übersetzt.
8 Caṅkamanadāyakattheraapadāna
Von diesem Text gibt es hier weder eine deutsche noch eine englische Übersetzung — angezeigt wird der Pāli-Wortlaut.
8 Caṅkamanadāyakattheraapadāna
“Atthadassissa munino,
lokajeṭṭhassa tādino;
Iṭṭhakāhi cinitvāna,
caṅkamaṁ kārayiṁ ahaṁ.
Uccato pañcaratanaṁ,
caṅkamaṁ sādhumāpitaṁ;
Āyāmato hatthasataṁ,
bhāvanīyyaṁ manoramaṁ.
Paṭiggahesi bhagavā,
atthadassī naruttamo;
Hatthena pulinaṁ gayha,
imā gāthā abhāsatha.
‘Iminā pulinadānena,
caṅkamaṁ sukatena ca;
Sattaratanasampannaṁ,
pulinaṁ anubhossati.
Tīṇi kappāni devesu,
devarajjaṁ karissati;
Anubhossati sampattiṁ,
accharāhi purakkhato.
Manussalokamāgantvā,
rājā raṭṭhe bhavissati;
Tikkhattuṁ cakkavattī ca,
mahiyā so bhavissati’.
Aṭṭhārase kappasate,
yaṁ kammamakariṁ tadā;
Duggatiṁ nābhijānāmi,
caṅkamassa idaṁ phalaṁ.
Paṭisambhidā catasso,
…pe…
kataṁ buddhassa sāsanaṁ”.
Itthaṁ sudaṁ āyasmā caṅkamanadāyako thero imā gāthāyo abhāsitthāti.
Caṅkamanadāyakattherassāpadānaṁ aṭṭhamaṁ.