Tha Ap 70
Lebensgeschichte des Mönchs Mangospender
Arbeitsübersetzung Dieser Titel ist maschinell übersetzt und noch nicht von Menschen geprüft. Der Text selbst ist nicht übersetzt.
Ambadāyakattheraapadāna
Von diesem Text gibt es hier weder eine deutsche noch eine englische Übersetzung — angezeigt wird der Pāli-Wortlaut.
Ambadāyakattheraapadāna
“Anomadassī bhagavā,
nisinno pabbatantare;
Mettāya aphari loke,
appamāṇe nirūpadhi.
Kapi ahaṁ tadā āsiṁ,
himavante naguttame;
Disvā anomadassiṁ taṁ,
buddhe cittaṁ pasādayiṁ.
Avidūre himavantassa,
ambāsuṁ phalino tadā;
Tato pakkaṁ gahetvāna,
ambaṁ samadhukaṁ adaṁ.
Taṁ me buddho viyākāsi,
anomadassī mahāmuni;
Iminā madhudānena,
ambadānena cūbhayaṁ.
Sattapaññāsakappamhi,
devaloke ramissati;
Avasesesu kappesu,
vokiṇṇaṁ saṁsarissati.
Khepetvā pāpakaṁ kammaṁ,
paripakkāya buddhiyā;
Vinipātamagantvāna,
kilese jhāpayissati.
Damena uttamenāhaṁ,
damitomhi mahesinā;
Pattomhi acalaṁ ṭhānaṁ,
hitvā jayaparājayaṁ.
Sattasattatikappasate,
ambaṭṭhajasanāmakā;
Catuddasa te rājāno,
cakkavattī mahabbalā.
Paṭisambhidā catasso,
…pe…
kataṁ buddhassa sāsanaṁ”.
Itthaṁ sudaṁ āyasmā ambadāyako thero imā gāthāyo abhāsitthāti.
Ambadāyakattherassāpadānaṁ aṭṭhamaṁ.