Vv 10
Die Geschichte vom Himmelspalast der Sesamspende
Arbeitsübersetzung Dieser Titel ist maschinell übersetzt und noch nicht von Menschen geprüft. Der Text selbst ist nicht übersetzt.
10. Tiladakkhiṇavimānavatthu
Von diesem Text gibt es hier weder eine deutsche noch eine englische Übersetzung — angezeigt wird der Pāli-Wortlaut.
Pīṭhavagga
10. Tiladakkhiṇavimānavatthu
“Abhikkantena vaṇṇena,
yā tvaṁ tiṭṭhasi devate;
Obhāsentī disā sabbā,
osadhī viya tārakā.
Kena tetādiso vaṇṇo,
kena te idha mijjhati;
Uppajjanti ca te bhogā,
ye keci manaso piyā.
Pucchāmi taṁ devi mahānubhāve,
Manussabhūtā kimakāsi puññaṁ;
Kenāsi evaṁ jalitānubhāvā,
Vaṇṇo ca te sabbadisā pabhāsatī”ti.
Sā devatā attamanā,
moggallānena pucchitā;
Pañhaṁ puṭṭhā viyākāsi,
yassa kammassidaṁ phalaṁ.
“Ahaṁ manussesu manussabhūtā,
Purimāya jātiyā manussaloke.
Addasaṁ virajaṁ buddhaṁ,
vippasannamanāvilaṁ;
Āsajja dānaṁ adāsiṁ,
akāmā tiladakkhiṇaṁ;
Dakkhiṇeyyassa buddhassa,
pasannā sehi pāṇibhi.
Tena metādiso vaṇṇo,
tena me idha mijjhati;
Uppajjanti ca me bhogā,
ye keci manaso piyā.
Akkhāmi te bhikkhu mahānubhāva,
Manussabhūtā yamakāsi puññaṁ;
Tenamhi evaṁ jalitānubhāvā,
Vaṇṇo ca me sabbadisā pabhāsatī”ti.
Tiladakkhiṇavimānaṁ dasamaṁ.