8. Goṇapetavatthu

Neither a German nor an English translation of this text is held here — the Pāli text is shown.

“Kiṁ nu ummattarūpova,
lāyitvā haritaṁ tiṇaṁ;
Khāda khādāti lapasi,
gatasattaṁ jaraggavaṁ.

Na hi annena pānena,
mato goṇo samuṭṭhahe;
Tvaṁsi bālo ca dummedho,
yathā taññova dummatī”ti.

“Ime pādā idaṁ sīsaṁ,
ayaṁ kāyo savāladhi;
Nettā tatheva tiṭṭhanti,
ayaṁ goṇo samuṭṭhahe.

Nāyyakassa hatthapādā,
kāyo sīsañca dissati;
Rudaṁ mattikathūpasmiṁ,
nanu tvaññeva dummatī”ti.

“Ādittaṁ vata maṁ santaṁ,
ghatasittaṁva pāvakaṁ;
Vārinā viya osiñcaṁ,
sabbaṁ nibbāpaye daraṁ.

Abbahī vata me sallaṁ,
sokaṁ hadayanissitaṁ;
Yo me sokaparetassa,
pitusokaṁ apānudi.

Svāhaṁ abbūḷhasallosmi,
sītibhūtosmi nibbuto;
Na socāmi na rodāmi,
tava sutvāna māṇava”.

Evaṁ karonti sappaññā,
ye honti anukampakā;
Vinivattayanti sokamhā,
sujāto pitaraṁ yathāti.

Goṇapetavatthu aṭṭhamaṁ.