Pv 8
Die Gespenstergeschichte vom Ochsen
Arbeitsübersetzung Dieser Titel ist maschinell übersetzt und noch nicht von Menschen geprüft. Der Text selbst ist nicht übersetzt.
8. Goṇapetavatthu
Von diesem Text gibt es hier weder eine deutsche noch eine englische Übersetzung — angezeigt wird der Pāli-Wortlaut.
8. Goṇapetavatthu
“Kiṁ nu ummattarūpova,
lāyitvā haritaṁ tiṇaṁ;
Khāda khādāti lapasi,
gatasattaṁ jaraggavaṁ.
Na hi annena pānena,
mato goṇo samuṭṭhahe;
Tvaṁsi bālo ca dummedho,
yathā taññova dummatī”ti.
“Ime pādā idaṁ sīsaṁ,
ayaṁ kāyo savāladhi;
Nettā tatheva tiṭṭhanti,
ayaṁ goṇo samuṭṭhahe.
Nāyyakassa hatthapādā,
kāyo sīsañca dissati;
Rudaṁ mattikathūpasmiṁ,
nanu tvaññeva dummatī”ti.
“Ādittaṁ vata maṁ santaṁ,
ghatasittaṁva pāvakaṁ;
Vārinā viya osiñcaṁ,
sabbaṁ nibbāpaye daraṁ.
Abbahī vata me sallaṁ,
sokaṁ hadayanissitaṁ;
Yo me sokaparetassa,
pitusokaṁ apānudi.
Svāhaṁ abbūḷhasallosmi,
sītibhūtosmi nibbuto;
Na socāmi na rodāmi,
tava sutvāna māṇava”.
Evaṁ karonti sappaññā,
ye honti anukampakā;
Vinivattayanti sokamhā,
sujāto pitaraṁ yathāti.
Goṇapetavatthu aṭṭhamaṁ.