Sobhitattheraapadāna

Neither a German nor an English translation of this text is held here — the Pāli text is shown.

“Padumuttaro nāma jino,
lokajeṭṭho narāsabho;
Mahato janakāyassa,
deseti amataṁ padaṁ.

Tassāhaṁ vacanaṁ sutvā,
vācāsabhimudīritaṁ;
Añjaliṁ paggahetvāna,
ekaggo āsahaṁ tadā.

‘Yathā samuddo udadhīnamaggo,
Nerū nagānaṁ pavaro siluccayo;
Tatheva ye cittavasena vattare’,
Na buddhañāṇassa kalaṁ upenti te.

Dhammavidhiṁ ṭhapetvāna,
buddho kāruṇiko isi;
Bhikkhusaṅghe nisīditvā,
imā gāthā abhāsatha.

‘Yo so ñāṇaṁ pakittesi,
buddhamhi lokanāyake;
Kappānaṁ satasahassaṁ,
duggatiṁ na gamissati.

Kilese jhāpayitvāna,
ekaggo susamāhito;
Sobhito nāma nāmena,
hessati satthu sāvako’.

Paññāse kappasahasse,
sattevāsuṁ yasuggatā;
Sattaratanasampannā,
cakkavattī mahabbalā.

Kilesā jhāpitā mayhaṁ,
bhavā sabbe samūhatā;
Tisso vijjā anuppattā,
kataṁ buddhassa sāsanaṁ.

Paṭisambhidā catasso,
vimokkhāpi ca aṭṭhime;
Chaḷabhiññā sacchikatā,
kataṁ buddhassa sāsanaṁ”.

Itthaṁ sudaṁ āyasmā sobhito thero imā gāthāyo abhāsitthāti.

Sobhitattherassāpadānaṁ paṭhamaṁ.