Tha Ap 133
Lebensgeschichte des Sobhita
Arbeitsübersetzung Dieser Titel ist maschinell übersetzt und noch nicht von Menschen geprüft. Der Text selbst ist nicht übersetzt.
Sobhitattheraapadāna
Von diesem Text gibt es hier weder eine deutsche noch eine englische Übersetzung — angezeigt wird der Pāli-Wortlaut.
Sobhitattheraapadāna
“Padumuttaro nāma jino,
lokajeṭṭho narāsabho;
Mahato janakāyassa,
deseti amataṁ padaṁ.
Tassāhaṁ vacanaṁ sutvā,
vācāsabhimudīritaṁ;
Añjaliṁ paggahetvāna,
ekaggo āsahaṁ tadā.
‘Yathā samuddo udadhīnamaggo,
Nerū nagānaṁ pavaro siluccayo;
Tatheva ye cittavasena vattare’,
Na buddhañāṇassa kalaṁ upenti te.
Dhammavidhiṁ ṭhapetvāna,
buddho kāruṇiko isi;
Bhikkhusaṅghe nisīditvā,
imā gāthā abhāsatha.
‘Yo so ñāṇaṁ pakittesi,
buddhamhi lokanāyake;
Kappānaṁ satasahassaṁ,
duggatiṁ na gamissati.
Kilese jhāpayitvāna,
ekaggo susamāhito;
Sobhito nāma nāmena,
hessati satthu sāvako’.
Paññāse kappasahasse,
sattevāsuṁ yasuggatā;
Sattaratanasampannā,
cakkavattī mahabbalā.
Kilesā jhāpitā mayhaṁ,
bhavā sabbe samūhatā;
Tisso vijjā anuppattā,
kataṁ buddhassa sāsanaṁ.
Paṭisambhidā catasso,
vimokkhāpi ca aṭṭhime;
Chaḷabhiññā sacchikatā,
kataṁ buddhassa sāsanaṁ”.
Itthaṁ sudaṁ āyasmā sobhito thero imā gāthāyo abhāsitthāti.
Sobhitattherassāpadānaṁ paṭhamaṁ.