Thambhāropakattheraapadāna

Neither a German nor an English translation of this text is held here — the Pāli text is shown.

“Nibbute lokanāthamhi,
dhammadassīnarāsabhe;
Āropesiṁ dhajatthambhaṁ,
buddhaseṭṭhassa cetiye.

Nisseṇiṁ māpayitvāna,
thūpaseṭṭhaṁ samāruhiṁ;
Jātipupphaṁ gahetvāna,
thūpamhi abhiropayiṁ.

Aho buddhā aho dhammā,
aho no satthu sampadā;
Duggatiṁ nābhijānāmi,
thūpapūjāyidaṁ phalaṁ.

Catunnavutito kappe,
thūpasīkhasanāmakā;
Soḷasāsiṁsu rājāno,
cakkavattī mahabbalā.

Paṭisambhidā catasso,
…pe…
kataṁ buddhassa sāsanaṁ”.

Itthaṁ sudaṁ āyasmā thambhāropako thero imā gāthāyo abhāsitthāti.

Thambhāropakattherassāpadānaṁ dutiyaṁ.