Kumudadāyakattheraapadāna

Neither a German nor an English translation of this text is held here — the Pāli text is shown.

“Himavantassāvidūre,
mahājātassaro ahu;
Padumuppalasañchanno,
puṇḍarīkasamotthaṭo.

Kukuttho nāma nāmena,
tatthāsiṁ sakuṇo tadā;
Sīlavā buddhisampanno,
puññāpuññesu kovido.

Padumuttaro lokavidū,
āhutīnaṁ paṭiggaho;
Jātassarassāvidūre,
sañcarittha mahāmuni.

Jalajaṁ kumudaṁ chetvā,
upanesiṁ mahesino;
Mama saṅkappamaññāya,
paṭiggahi mahāmuni.

Tañca dānaṁ daditvāna,
sukkamūlena codito;
Kappānaṁ satasahassaṁ,
duggatiṁ nupapajjahaṁ.

Soḷaseto kappasate,
āsuṁ varuṇanāmakā;
Aṭṭha ete janādhipā,
cakkavattī mahabbalā.

Paṭisambhidā catasso,
…pe…
kataṁ buddhassa sāsanaṁ”.

Itthaṁ sudaṁ āyasmā kumudadāyako thero imā gāthāyo abhāsitthāti.

Kumudadāyakattherassāpadānaṁ dasamaṁ.

Bandhujīvakavaggo soḷasamo.

Tassuddānaṁ

Bandhujīvo tambapupphī,
vīthikakkārupupphiyo;
Mandāravo kadambī ca,
sūlako nāgapupphiyo;
Punnāgo komudī gāthā,
chappaññāsa pakittitāti.