Naḷinakesariyattheraapadāna

Neither a German nor an English translation of this text is held here — the Pāli text is shown.

“Jātassarassa vemajjhe,
vasāmi jalakukkuṭo;
Addasāhaṁ devadevaṁ,
gacchantaṁ anilañjase.

Tuṇḍena kesariṁ gayha,
vippasannena cetasā;
Buddhassa abhiropesiṁ,
tissassa lokabandhuno.

Dvenavute ito kappe,
yaṁ pupphamabhipūjayiṁ;
Duggatiṁ nābhijānāmi,
buddhapūjāyidaṁ phalaṁ.

Tesattatimhi kappamhi,
satta kesaranāmakā;
Sattaratanasampannā,
cakkavattī mahabbalā.

Paṭisambhidā catasso,
…pe…
kataṁ buddhassa sāsanaṁ”.

Itthaṁ sudaṁ āyasmā naḷinakesariyo thero imā gāthāyo abhāsitthāti.

Naḷinakesariyattherassāpadānaṁ tatiyaṁ.