Dhammasaññakattheraapadāna

Neither a German nor an English translation of this text is held here — the Pāli text is shown.

“Vipassino bhagavato,
Mahābodhimaho ahu;
Rukkhaṭṭhasseva sambuddho,
Lokajeṭṭho narāsabho.

Bhagavā tamhi samaye,
bhikkhusaṅghapurakkhato;
Catusaccaṁ pakāseti,
vācāsabhimudīrayaṁ.

Saṅkhittena ca desento,
vitthārena ca desayaṁ;
Vivaṭṭacchado sambuddho,
nibbāpesi mahājanaṁ.

Tassāhaṁ dhammaṁ sutvāna,
lokajeṭṭhassa tādino;
Vanditvā satthuno pāde,
pakkāmiṁ uttarāmukho.

Ekanavutito kappe,
yaṁ dhammamasuṇiṁ tadā;
Duggatiṁ nābhijānāmi,
dhammasavassidaṁ phalaṁ.

Tettiṁsamhi ito kappe,
eko āsiṁ mahīpati;
Sutavā nāma nāmena,
cakkavattī mahabbalo.

Paṭisambhidā catasso,
…pe…
kataṁ buddhassa sāsanaṁ”.

Itthaṁ sudaṁ āyasmā dhammasaññako thero imā gāthāyo abhāsitthāti.

Dhammasaññakattherassāpadānaṁ catutthaṁ.