Bodhivandakattheraapadāna

Neither a German nor an English translation of this text is held here — the Pāli text is shown.

“Pāṭaliṁ haritaṁ disvā,
pādapaṁ dharaṇīruhaṁ;
Ekaṁsaṁ añjaliṁ katvā,
avandiṁ pāṭaliṁ ahaṁ.

Añjaliṁ paggahetvāna,
garuṁ katvāna mānasaṁ;
Antosuddhaṁ bahisuddhaṁ,
suvimuttamanāsavaṁ.

Vipassiṁ lokamahitaṁ,
karuṇāñāṇasāgaraṁ;
Sammukhā viya sambuddhaṁ,
avandiṁ pāṭaliṁ ahaṁ.

Ekanavutito kappe,
yaṁ bodhimabhivandahaṁ;
Duggatiṁ nābhijānāmi,
vandanāya idaṁ phalaṁ.

Paṭisambhidā catasso,
vimokkhāpi ca aṭṭhime;
Chaḷabhiññā sacchikatā,
kataṁ buddhassa sāsanaṁ”.

Itthaṁ sudaṁ āyasmā bodhivandako thero imā gāthāyo abhāsitthāti.

Bodhivandakattherassāpadānaṁ paṭhamaṁ.