Vv 17
17. Kesakārīvimānavatthu
Neither a German nor an English translation of this text is held here — the Pāli text is shown.
Pīṭhavagga
17. Kesakārīvimānavatthu
“Idaṁ vimānaṁ ruciraṁ pabhassaraṁ,
Veḷuriyathambhaṁ satataṁ sunimmitaṁ;
Suvaṇṇarukkhehi samantamotthataṁ,
Ṭhānaṁ mamaṁ kammavipākasambhavaṁ.
Tatrūpapannā purimaccharā imā,
Sataṁ sahassāni sakena kammunā;
Tuvaṁsi ajjhupagatā yasassinī,
Obhāsayaṁ tiṭṭhasi pubbadevatā.
Sasī adhiggayha yathā virocati,
Nakkhattarājāriva tārakāgaṇaṁ;
Tatheva tvaṁ accharāsaṅgaṇaṁ imaṁ,
Daddallamānā yasasā virocasi.
Kuto nu āgamma anomadassane,
Upapannā tvaṁ bhavanaṁ mamaṁ idaṁ;
Brahmaṁva devā tidasā sahindakā,
Sabbe na tappāmase dassanena tan”ti.
“Yametaṁ sakka anupucchase mamaṁ,
‘Kuto cutā tvaṁ idha āgatā’ti;
Bārāṇasī nāma puratthi kāsinaṁ,
Tattha ahosiṁ pure kesakārikā.
Buddhe ca dhamme ca pasannamānasā,
Saṅghe ca ekantagatā asaṁsayā;
Akhaṇḍasikkhāpadā āgatapphalā,
Sambodhidhamme niyatā anāmayā”ti.
“Tantyābhinandāmase svāgatañca te,
Dhammena ca tvaṁ yasasā virocasi;
Buddhe ca dhamme ca pasannamānase,
Saṅghe ca ekantagate asaṁsaye;
Akhaṇḍasikkhāpade āgatapphale,
Sambodhidhamme niyate anāmaye”ti.
Kesakārīvimānaṁ sattarasamaṁ.
Tassuddānaṁ
Pañca pīṭhā tayo nāvā,
dīpatiladakkhiṇā dve;
Pati dve suṇisā uttarā,
sirimā kesakārikā;
Vaggo tena pavuccatīti.
Itthivimāne paṭhamo vaggo.