4. Caṇḍālivimānavatthu

Neither a German nor an English translation of this text is held here — the Pāli text is shown.

Cittalatāvagga

“Caṇḍāli vanda pādāni,
gotamassa yasassino;
Tameva anukampāya,
aṭṭhāsi isisattamo.

Abhippasādehi manaṁ,
arahantamhi tādini;
Khippaṁ pañjalikā vanda,
parittaṁ tava jīvitan”ti.

Coditā bhāvitattena,
sarīrantimadhārinā;
Caṇḍālī vandi pādāni,
gotamassa yasassino.

Tamenaṁ avadhī gāvī,
caṇḍāliṁ pañjaliṁ ṭhitaṁ;
Namassamānaṁ sambuddhaṁ,
andhakāre pabhaṅkaranti.

“Khīṇāsavaṁ vigatarajaṁ anejaṁ,
Ekaṁ araññamhi raho nisinnaṁ;
Deviddhipattā upasaṅkamitvā,
Vandāmi taṁ vīra mahānubhāvan”ti.

“Suvaṇṇavaṇṇā jalitā mahāyasā,
Vimānamoruyha anekacittā;
Parivāritā accharāsaṅgaṇena,
Kā tvaṁ subhe devate vandase maman”ti.

“Ahaṁ bhaddante caṇḍālī,
tayā vīrena pesitā;
Vandiṁ arahato pāde,
gotamassa yasassino.

Sāhaṁ vanditvā pādāni,
cutā caṇḍālayoniyā;
Vimānaṁ sabbato bhaddaṁ,
upapannamhi nandane.

Accharānaṁ satasahassaṁ,
purakkhatvāna tiṭṭhati;
Tāsāhaṁ pavarā seṭṭhā,
vaṇṇena yasasāyunā.

Pahūtakatakalyāṇā,
Sampajānā paṭissatā;
Muniṁ kāruṇikaṁ loke,
Taṁ bhante vanditumāgatā”ti.

Idaṁ vatvāna caṇḍālī,
kataññū katavedinī;
Vanditvā arahato pāde,
tatthevantaradhāyathāti.

Caṇḍālivimānaṁ catutthaṁ.