Tha Ap 15
Die Lebensgeschichte des Nanda
Arbeitsübersetzung Dieser Titel ist maschinell übersetzt und noch nicht von Menschen geprüft. Der Text selbst ist nicht übersetzt.
Nandattheraapadāna
Von diesem Text gibt es hier weder eine deutsche noch eine englische Übersetzung — angezeigt wird der Pāli-Wortlaut.
Nandattheraapadāna
“Padumuttarassa bhagavato,
Lokajeṭṭhassa tādino;
Vatthaṁ khomaṁ mayā dinnaṁ,
Sayambhussa mahesino.
Taṁ me buddho viyākāsi,
jalajuttaranāmako;
‘Iminā vatthadānena,
hemavaṇṇo bhavissasi.
Dve sampattī anubhotvā,
kusalamūlehi codito;
Gotamassa bhagavato,
kaniṭṭho tvaṁ bhavissasi.
Rāgaratto sukhasīlo,
kāmesu gedhamāyuto;
Buddhena codito santo,
tadā tvaṁ pabbajissasi.
Pabbajitvāna tvaṁ tattha,
kusalamūlena codito;
Sabbāsave pariññāya,
nibbāyissasināsavo’.
Satta kappasahassamhi,
caturo ceḷanāmakā;
Saṭṭhi kappasahassamhi,
upacelā catujjanā.
Pañca kappasahassamhi,
ceḷāva caturo janā;
Sattaratanasampannā,
catudīpamhi issarā.
Paṭisambhidā catasso,
vimokkhāpi ca aṭṭhime;
Chaḷabhiññā sacchikatā,
kataṁ buddhassa sāsanaṁ”.
Itthaṁ sudaṁ āyasmā nando thero imā gāthāyo abhāsitthāti.
Nandattherassāpadānaṁ tatiyaṁ.